LRN News جريدة الكترونية شاملة
مقالات مشابهة
*لأنها صرخة تُمثّل وجع الناس فإننا نتبنّى كلام الصديق المحامي الأستاذ حسن عادل بزي كلمة كلمة وحرف حرف* :
وزير الداخلية قال أنه هناك قوى خارجية عم تدفع المودعين لاقتحام المصارف وتدمير القطاع المصرفي.
اسمع أيها الوزير القاضي الذي يديرك أصغر ضابط في وزارتك :
أولاً : طبق القانون على نفسك وبلغ مدير عام قوى الأمن الداخلي مواعيد جلسات التحقيق أمام قاضي التحقيق الأول في جبل لبنان بجرم عرقلة سير القضاء بناء لادعاء القاضية غادة عون ضده لأنه منع أمن الدولة من اعتقال الحرامي رياض سلامة ، يعني مش مقبول كل مرة نبعتلو التبليغ وحضرتك تحطو عندك بالجارور .
ثانياً : سامع شي بسفارة وجع الناس؟
سامع بالمودعين اللي عم ينذلوا على أبواب المصارف لياخدوا 200$ شهرياً ؟
سامع بالمودعين اللي امتنعت المصارف عن تحويل أقساط أولادهم اللي عم يتعلموا بالخارج وبعضهم خسر عامه الدراسي؟
سامع بالمرضى اللي المصارف رافضة تدفع فواتير علاجهم رغم أنه ودائعهم بتغطيها؟
هيدول الناس فجروا وأعلنوها ثورة لاسترداد حقهم وكرامتهم من عصابة المصارف من دون أي ارتباط بينهم ولا أدنى معرفة.
بسام الشيخ حسين حدا حرّكه؟ ملفه حفظ… ليش؟
سالي حافظ صرلها سنة عم تترجى المصرف من أجل عملية سرطان ضرورية لشقيقتها ،
القرقماز طلع مناصر لحركة أمل… أي سفارة حرّكته؟
الموسوي مقرب من الثنائي.. أي سفارة حرّكته؟
عبد سوبرة اعتقد بفلك تيار المستقبل، معقول السفارة السعودية حركته أم وجعه وحاجته للمال؟
بربك خفف تهويل عالناس لتغطي فشل وزارتك…
بس بتعرف وين المصيبة؟
المصيبة اذا انت مقتنع بكلامك ساعتها منعرف أنه ليش بلدنا فلتان أمنياً مع هيك قناعات وتحليلات خنفشارية ومضحكة.
يا ريت تخبر الناس أنه المصارف قرطت 120 مليار دولار من أموال المودعين،
يا ريت تخبرهم أنه المصارف حولت 2 مليار دولار بعد ثورة 17 تشرين لمصلحة السياسيين اللصوص،
يا ريت بتطلع على تقرير الخبراء المقدم للقاضية غادة عون بالشكوى اللي قدمناها ضد المصارف لتعرف كم عرص سياسي ومصرفي تواطؤوا على اجراء تحويلات مصرفية (ليلية) بمئات ملايين الدولارات بالوقت اللي المودع عم ينذل ليسترد 100$ من وديعته .
خلص يا وزير الداخلية…
بربك حافظ على تاريخك القضائي اللي احترق بسبب ضعف أدائك الوزاري.
اللي بيطلع من ثوب الناس الموجوعة وبيستخدم الأمن لخدمة مصالح الظالمين نهايته أكيد مش مشرفة.
والسلام على من اتبع… ضميره.
المحامي حسن عادل بزي
